काठमाडौं । उपप्रधान एवं गृहमन्त्री रवि लामिछानेमाथि संसदीय समिति बनाएर छानबिन हुनुपर्ने माग राख्दै सदन अवरोध गरिरहेको नेपाली कांग्रेस आइतबार दिउँसो सडकमा पनि पुगेको छ ।

गृहमन्त्री लामिछाने संलग्न देखिएको सहकारीमा संसदीय समिति बनाएर छानबिन हुनुपर्ने र पासपोर्टको विषय पनि छानबिनको दायरामा ल्याउनुपर्ने माग राख्दै संसदमा अवरोध गरिरहेको कांग्रेस आइतबार दिउँसोदेखि सडक प्रदर्शनमा उत्रिएको हो ।

आइतबार दिउँसो २ बजेका लागि काठमाडौंस्थित प्रदर्शनी मार्गमा आयोजना गरिएको विरोध सभामा भातृ संगठनहरू नेपाल विद्यार्थी संघ, तरुण दल नेपाल, कांग्रेसका नेता तथा कार्यकर्ताहरूको सहभागिता रहेको छ ।

राष्ट्रिय सभा सदस्य समेत रहेका कांग्रेस नेता कृष्णप्रसाद सिटौला, मिन विश्वकर्मा र गोपालमान श्रेष्ठ लगायतका नेताहरू पनि प्रदर्शन स्थलमा पुगेका थिए ।