काठमाडौं । काठमाडौं महानगरपालिकाका मेयर बालेन्द्र साह (बालेन) ले भौतिक पूर्वाधार तथा यातायात मन्त्री रघुवीर महासेठलाई धुलो उपहार पठाउनुभएको छ। 

मेयर साहले शनिबार मन्त्री महासेठलाई एक ट्रक धुलो उपहार पठाउनुभएको हो । उहाँले विगत १५ वर्षदेखि काठमाडौंका जनताले कलंकीदेखि महाराजगञ्जसम्म रिङरोड विस्तारको नाममा धेरै धुलो र कष्ट व्यहोर्नु परेको भन्दै धुलो पठाएको कुरा शनिबार सामाजिक संजाल फेसबुकमार्फत जानकारी गराउनुभएको छ ।

जबसम्म काम अगाडि बढ्दैन तबसम्म प्रत्येक दिन मन्त्री महासेठलाई पायक पर्ने ठाउँमा एक ट्रक धुलो उपहार पठाउने र माया सम्झेर स्वीकार्न समेत उहाँले अनुरोध गर्नुभएको हो । मेयर साहले सोही मन्त्रालयको सडक विभाग सुपरिवेक्षण तथा अनुगमन कार्यालय अगाडि एक ट्रक धुलो खन्याएको भिडियो सामाजिक सञ्जाल फेसबुकमा राख्नुभएको छ ।

मेयर साहले आफ्नो सामाजिक संजाल फेसबुकमा यस्तो लेख्नुभएको छ: 

माननीय भौतिक पूर्वाधार तथा यातायात मन्त्री रघुवीर महासेठज्यु !

'तपाईको ठाडो आदेशले भइरहेको कुनै काम रोक्न सक्नुहुन्छ भने त्यहीं आदेशले बनाउन पनि सक्नुहुन्छ होला । विगत १५ वर्षदेखि काठमाडौंको जनताले कलंकीदेखि महाराजगन्जसम्म रिङरोड विस्तारको नाममा धेरै धुलो र कष्ट बेहोर्नु परेको छ ।काठमाडौंमा हुने आधा भन्दा बढी प्रदूषणमा त्यहाँ कै धुलोको हात छ । जसले गर्दा महानगरवासीले धुवाँधुलो खानु परेको छ । त्यो बाटो प्रयोग गर्नुपर्नेहरूले सवारी साधन मर्मतमा खर्च बढी गर्नु परेको छ, पुग्न अबेला भोग्नु परेको छ । र, काठमाडौं महानगरले अकारणमा गाली खानु परेको छ । यो धुलो जनताले मात्र खाँदा राम्रो देखिंदैन । जबसम्म तपाई काम अगाडि बढाउनुहुन्न, हरेक दिन तपाईलाई पायक पर्ने ठाउँमा एक ट्रक धुलो उपहार पठाउने छु माया सम्झेर स्वीकार्नु होला ।'