काठमाडौं । प्रधानमन्त्री पुष्पकमल दाहालले जलवायु परिवर्तनका कारण पर्वतीय समुदायमा पारेको प्रभाव न्यूनिकरणका लागि तत्काल कदम चाल्नुपर्ने बताउनुभएको छ ।

बुधबार काठमाडौंमा आयोजित ‘हिमाल-जनता तथा जलवायु परिवर्तन’ विषयक अन्तर्राष्ट्रिय विज्ञ संवादलाई सम्बोधन गर्दै उहाँले यस्तो बताउनुभएको हो । पर्वतीय समुदाय, उनीहरूले प्रदान गर्ने पारिस्थितिकीय सेवामा प्रभावका बारेमा बढ्दो चिन्ता र चासो समाधान गर्न एकीकृत पर्वतीय आवाजको तत्काल सम्बोधन हुनुपर्ने उहाँले बताउनुभयो ।

प्रधानमन्त्री दाहालले पर्वतीय देशका मान्यता प्रवद्र्धनका लागि सामूहिक यात्रा सकारात्मक रुपमा अघि बढेको बताउनुभएको छ । उहाँले जलवायु परिवर्तनका कारण पर्वतीय क्षेत्रहरूमा हिउँ र हिमनदी पग्लिने दरलाई तीब्र भएको बताउनुभयो । जलवायु परिवर्तनले पर्वतीय क्षेत्रका बासिन्दाहरुको संस्कृति, सम्पदा, ज्ञान, अभ्यासको विस्थापनबाट जलवायु प्रेरित प्रकोप र अन्य प्रभावहरूले पर्वतीय जीविकोपार्जनलाई गम्भीर असर पुर्याएको उहाँको दावी छ । 

प्रधानमन्त्री दाहालले हिमाली क्षेत्रका जनताको कल्याण गर्न, पारिस्थितिकीय प्रणालीको विविधता, स्थिरता, स्थायित्व बढाउन, स्थानीय आवश्यकताहरूलाई ध्यानमा राख्दै दिगो विकासका विकल्पहरू पहिचान गर्न क्षेत्रीय र विश्वव्यापी सहयोगमा ध्यान केन्द्रित हुने पनि बताउनुभयो । प्रधानमन्त्री दाहालले पर्वतीय मुद्दाहरूलाई अगाडि बढाउन एवं पर्वत, समस्याको दिगो समाधान खोज्नका लागि विश्वव्यापी सहमति र समर्थनको आवश्यकता रहेको बताउनुभएको छ ।

जलवायु परिवर्तनसँग सामना गर्नुपर्ने तत्कालको आवश्यकता बुझेर नै नेपालले अन्तर्राष्ट्रिय संवाद आयोजना गरेको उहाँको भनाइ छ ।