काठमाडौं । नेकपा एकीकृत समाजवादी पार्टीका अध्यक्ष माधव कुमार नेपालले कान्तिपुर मिडिया ग्रुपका अध्यक्ष  कैलाश सिरोहियालाई पक्राउ गर्ने तरिका गलत भएको बताउनुभएको छ ।

ललितपुरमा शुक्रबार आयोजित एक कार्यक्रमपछि सञ्चारकर्मीसँग कुरा गर्दै उहाँले यस्तो बताउनुभएको हो । कुनै विषयमा बुझ्न खोजे बोलाएर छलफल गर्न सकिने भए पनि सिरोहियालाई कार्यकक्षबाटै पक्राउ गर्ने तरिका गलत भएको उहाँको तर्क छ । 

अनुचित गरेको छ भने उचित ढंगले सजाय गर्न सकिने भए पनि गम्भीर अपराधी जस्तो पहिले नै गिरफ्तार गर्ने कामलाई परिवर्तन गर्नुपर्ने उहाँले बताउनुभयो। विषय एउटा र तर्साउन खोजेको अर्को भन्ने कुराहरु उठिरहेको भन्दै तर्साएर शासन गर्ने सोचिएको भए गलत भएको धारणा समेत अध्यक्ष नेपालले राख्नुभएको छ ।

त्यस्तै, अहिले देखिएको राजनीतिक गतिरोध वार्ता र छलफलबाट समाधान गर्नुपर्नेमा उहाँले जोड दिनुभयो।