काठमाडौं । जलवायु जोखिमको अवस्थालाई मध्यनजर गर्दै नेपालमा बुधबारदेखि अन्तर्राष्ट्रिय संवाद हुने भएको छ ।

सोही संवादको प्रधानमन्त्री पुष्पकमल दाहालले उद्घाटन गर्ने कार्यक्रम रहेको हो। बिहीबारसम्म संचालन हुने ‘हिमाल, मानव र जलवायु परिवर्तन: विशेषज्ञहरूको अन्तर्राष्ट्रिय संवाद’ मा २५ वटा देशका विशेषज्ञको सहभागिता रहने भएको छ ।

संवादमा नेपाललगायत पर्वतीय, टापु देश, अन्तर्राष्ट्रिय समुदाय, विकास साझेदार, अन्तर्राष्ट्रिय गैरसरकारी संस्था, निजी क्षेत्र र नागरिक समाजका प्रतिनिधि गरी २ सय भन्दा बढीको सहभागिता हुने बताइएको हो । संवादका क्रममा ३ वटा प्रमुख विषयगत क्षेत्रमा आधारित रहेर २ वटा प्रारम्भिक र ७ वटा संवाद सञ्चालन गर्नेगरी तयारी गरिएको बताइएको छ ।

जलवायु परिवर्तन सम्बन्धी विज्ञ संवादको उद्देश्य पर्वतीय पारिस्थितिकीय प्रणालीमा आधारित जलवायु उत्थानशील कार्यहरूलाई सुदृढ, समन्वय र प्राथमिकता दिने भएको हो ।

संवादमा संयुक्त राष्ट्रसंघीय जलवायु परिवर्तन सम्बन्धी वैज्ञानिक, प्राविधिक सल्लाहका लागि सहायक निकाय (साब्टा) का अध्यक्ष, विश्व बैंक र एसियाली विकास बैंक लगायत निकायका प्रतिनिधि सहभागी हुने भएका छन् ।