काठमाडौं । प्रमुख प्रतिपक्षी नेपाली कांग्रेसले सरकारविरूद्ध सडक आन्दोलन गर्ने सडक आन्दोलनको घोषणा गरेको छ ।

पार्टी केन्द्रीय कार्यालय सानेपामा बुधबार बसेको केन्द्रीय समिति र संसदीय दलको संयुक्त बैठकले सडक आन्दोलनमा जाने निर्णय गरेको केन्द्रीय सदस्य डा. डिला संग्रौलाले बताउनुभएको हो । बैठकको निर्णय अनुसार प्रथम चरणमा यहि शुक्रबार काठमाडौंको भृकुटीमण्डपमा बृहत प्रदर्शन गर्ने उहाँको भनाइ छ ।

त्यसपछि मधेश प्रदेशसहित सहकारी ठगीबाट बढी प्रभावित जिल्लामा आन्दोलन शुरु गर्ने कांग्रेसले जनाएको हो। सहकारी प्रकरण प्रभावित सहरहरू पोखरा, चितवन र रुपन्देही हुँदै देशभर आन्दोलन गर्ने रणनीति कांग्रेसले बनाएको छ ।

कान्तिपुर मिडिया ग्रुपका अध्यक्ष कैलाश सिरोहियालाई गिरफ्तार गरेर प्रेस स्वतन्त्रता हनन् गरिएको निष्कर्ष पनि बैठकले निकालेको उहाँले बताउनुभयो । उपप्रधान एवं गृहमन्त्री रवि लामिछानेको राजीनामा माग्ने विषयलाई पनि प्रमुख एजेण्डा बनाएर कांग्रेसले अहिले छलफल गरिरहेको छ।