तेस्रो तथा अन्तिम एकदिवसीय अन्तर्राष्ट्रिय क्रिकेट प्रतियोगितामा सोमबार क्यानडाले दिएको दुई सय ३३ रनको लक्ष्य पछ्याउँदै जवाफी ब्याटिङमा ओर्लिएको नेपालका लागि ओपनर ब्याट्सम्यान अनिल शाहले अर्धशतक बनाएका छन् । 

अनिल ५१ बलको सामना गरी एक छक्का र आठ चौकाको मद्दतले ५० रन बनाउँदै क्रिजमा छन् । अनिलले १४.५ ओभरमा आफ्नो अर्धशतक पूरा गरेका थिए । क्यानडाविरुद्धको जारी शृंखलामा उनले बनाएको यो लगातार दोस्रो अर्धशतक हो । यसअघि शनिबार खेलिएको शृंखलाको दोस्रो खेलमा पनि उनले उत्कृष्ट अर्धशतक बनाएका थिए । 

उक्त खेलमा २५ वर्षीय अनिलले ५० रन बनाएका थिए । उनले केवल २० बलको सामना गरी तीन छक्का र सात चौका पनि हिर्काएका थिए । त्यो खेलमा उनले एकदिवसीय अन्तर्राष्ट्रिय क्रिकेटमा नेपालका लागि सबैभन्दा कम बलमा अर्धशतक बनाउने खेलाडीको कीर्तिमान पनि रचेका थिए । उनले आफ्नो खेलजीवनको छैटौँ एकदिवसीय अन्तर्राष्ट्रिय प्रतियोगिता खेलिरहेका हुन् । 

१५ ओभरको खेल सकिँदासम्म नेपालले एक विकेट गुमाएर ८३ रन बनाएको छ । भीम सार्की पनि १३ रन बनाउँदै क्रिजमा छन् ।