सरोकारवालाहरुको चिन्ता : शिक्षा विधेयक हुबहु पारित भए शिक्षा क्षेत्रमा संकट ल्याउँछ
संसदमा दर्ता भएको शिक्षा विधेयक परिमार्जन नभए शिक्षा क्षेत्रमा संकट ल्याउने सरोकारवालाहरुले चिन्ता व्यक्त गरेका छन् ।
नेकपा एकीकृत समाजवादी निकट विद्यार्थी संगठन अनेरास्ववियू काठमाडौंमा गरेको अन्तक्रियामा विधेयक शिक्षा क्षेत्रको हित विपरीत रहेको सरोकारवालाले बताएका छन् ।
पूर्व मन्त्री एवं नेकपा एकीकृत समाजवादीका पोलिटब्युरो सदस्य मेटमणी चौधरीले विद्यालय शिक्षा विधेयकलाई संसोधन गरेर मात्रै पास गर्नुपर्ने बताए ।
शिक्षाविद प्रा. डा. विद्यानाथ कोइरालाले विधेयकले निजि र सार्वजनिक शिक्षा बीचको असमानता हल गर्ने ठोस उपाय विधेयकले निकाल्न नसकेको दावी गरे ।
शहरका निजि विद्यालयमा ५० देखि ७० प्रतिशत जनताका छोराछोरी पढ्ने गरेको उल्लेख कोइरालाले गरे । सरकारी शिक्षा कमजोर हुनुमा शिक्षककै कमजोरी रहेको उनले तर्क राखे ।
कोइरालाले ४ वटा विषय अंग्रेजीमा पढाउनु पर्ने व्यवस्था विधेयकबाट ल्याउन खोजिए पनि शिक्षक जनशक्तिको अभावले प्रभावकारी नहुने कोइरालाले बताए ।
शिक्षक महासंघकी अध्यक्ष कमला तुलाधरले विद्यमान विधेयक मुलतः शिक्षकहरुको हक र अधिकारलाई कुण्ठित गर्ने गरी ल्याउन खोजिएको टिप्पणी गरिन् ।
